GENERAL SANTOS CITY- Patay ang usa ka pulis nga target sa gikasa nga buy-bust operation human matud pa misukol.
Sa impormasyon gikan kang Police Senior Inspector Romeo Albano Jr., deputy station commander sa Polomolok Municipal Police Station, giila niini ang napatay nga pulis nga si PO2 Ernie Sagabay.
Gipahigayon ang operasyon alas-3:00 kagahapon sa hapon sa Brgy Magsaysay, Polomolok, South Cotabato.
Narekober kaniya ang usa ka sachet sa shabu ug P1,000 nga marked money.
Nakamatikod matud pa si Sagabay nga mga pulis ang ka-transaksyon hinungdan nga nagpabuto ug pusil.
Mibalos ang mga otoridad ug naigo sa bala ang target. Nadala pa sa balay-tambalanan ang nahisgutang pulis, apan gideklarang dead on arrival.
Nasayran nga kanhi nang gikasuhan may kalabutan sa iligal nga paghupot ug armas si PO2 Sagabay ug nakapiyansa, ug napreso usab kaniadto human naabtan sa panimalay sa target sa gipahigayon kaniadto nga one time big time operation.
Na-assign usab matud pa sa Regional Holding and Accounting Unit gumikan sa kaso.
Nalambigit usab matud pa si Sagabay sa pagpusil sa usa ka pulis sa COMPAC sa Polomolok.
