Dead on arrival sa ospital ang usa ka aktibong pulis human kini pusila sa iyang ugangan nga babaye didto sa Brgy. Poblacion, President Quirino, Sultan Kudarat.
Gipaila sa mga otoridad ang biktima nga si Police Staff Sergeant Bobby Nanali, 37 anyos, residente ug Warrant PNCO sa President Quirino PNP.
Matod ni Sultan Kudarat Provincial Police Office Director PCol Bernard Lao sa usa ka interbyu, may nahitabong mainit nga panaglalis tali sa biktima ug sa iyang asawa una pa ang insidente, nga misangpot sa pagdaug-daugay sa pusil.
Gikompirma sa asawa sa biktima, nga usa usab ka aktibong miyembro sa PNP, nga iyang nakuha ang pusil ug gihatag kini sa iyang inahan, 60 anyos, nga anaa usab sa ilang balay niadtong higayona.
Dugang pa, misulod sa ilang garahe ang biktima apan gisundan siya sa iyang asawa ug ugangan, ug nagpadayon gihapon ang ilang panag-away. Sa maong higayon, giingon nga gipusil siya sa iyang ugangan.
Naigo si Nanali sa likod ug misulod kini sa iyang tiyan.
Gidala pa siya sa tambalanan apan nideklarar gihapon siyang patay.
Sa pagkakaron, anaa na sa kustodiya sa President Quirino MPS ang mga suspetsado ug andam na ang mga kasong ipasaka batok kanila.
