Nanawagan si Mario Aguja, usa ka Public Sociologist sa Mindanao State University, sa mas lawom nga pagsusi sa background sa mga kabataang nalambigit sa mga krimen, ilabina ang ilang palibot, mga tawo nga nag-atiman kanila ug ang paagi sa ilang pagdako.
Kini human sa makalilisang nga insidente sa pagpamusil sa usa ka eskwelahan sa Tacloban City nga nagbilin og mga namatay ug nasamdan.
Matud ni Aguja, seryoso ug makaguol ang nahitabo, apan dili angay nga diretsohon og basol ang mga menor de edad nga nalambigit sa insidente tungod kay mga bata pa gihapon ang ilang panghunahuna ug pagtan-aw sa mga butang.
Gipasiugda niya nga importante nga masabtan ang mga hinungdan nga mahimong nakaimpluwensya sa ilang pamatasan aron matubag ang ugat sa problema ug malikayan ang susamang mga insidente sa umaabot.
Dugang niya, kinahanglan nga dungan nga tan-awon sa katilingban ang papel sa pamilya, komunidad ug eskwelahan sa paghulma sa kinaiya ug panghunahuna sa mga kabatan-onan.
