GENSAN – Nagpahimangno si Atty. Jong Gonzales, hepe sa Public Safety Office (PSO) sa General Santos City, sa tanan nga mga tricycle drivers nga dili gayud pagamyan o usbon ang taripa nga ibitay sa ilang mga unit.
Matud pa ni Gonzales, importante ang taripa tungod kay kini ang opisyal nga gi-ila sa syudad nga mosulti kung pila ra ang hustong bayad nga ipangayo sa mga pasahero. Gidugang pa niya nga ang pag-usab o pagkunhod sa taripa mahimong magdala og kalibog ug posibleng pag-abuso sa taripa systema.
Giingon usab sa PSO nga ang maong taripa usa ka pamaagi aron maprotektahan ang interes sa mga pasahero ug masiguro nga patas ug klaro ang plete nga ilang ibayad matag biyahe.
Gidugang pa ni Gonzales nga ang tanan nga drayber kinahanglan magpabilin nga masinugtanon ug tumanon ang nakabutang sa taripa aron malikayan ang kasamok tali sa pasahero ug drayber, ug aron magpabilin nga malinawon ug hapsay ang operasyon sa transportasyon sa dakbayan.
