PSO nagpahibalo nga kapin 1,500 slots na lang ang nahibilin alang sa tricycle franchize

GENSAN– Nagpahibalo si Atty. Jong Gonzales, labaw sa Public Safety Office (PSO) sa Gensan sa mga driver nga gustong mahimong legal ang ilang pagpamasada nga aduna pay nabilin nga slots sa prangkisa alang sa traysikol.

Matod niini, gikan sa 9,000 nga giablihan nga prangkisa, mukabat sa 7,428 na ang na-isyu hangtod Nobyembre 5 sa ilang opisina.

Buot ipasabot, 1,562 ka prangkisa na lang ang nabilin nga available, busa, nanawagan si Atty. Gonzales sa mga wala pa makakuha og prangkisa nga mag-apply na.

Nagpasidaan sa mga applicant nga kumpletuhon ang mga papeles aron paspas ang pagproseso sa pag-apply.

Subling gihingusgan sa PSO department head nga mas maayong legal ang pagpamasada kaysa sa kolorum.