Gisusi sa Philippine Sports Commission o PSC ang posibilidad sa pagtukod og mga “regional training center” sa nagkalain-laing bahin sa nasod aron mas mapalambo ang pagkat-on sa mga Pilipino sa tennis.
Lakip sa giplanong mga pasilidad ang mga imprastruktura ug kagamitan nga magamit sa mga atleta alang sa mas hapsay ug de-kalidad nga pagbansay.
Sa deliberasyon sa plenaryo sa House of Representatives alang sa gisugyot nga 2027 budget sa PSC, gipangutana ni Philreca Party-list Representative Presley De Jesus ang mga programa sa komisyon alang sa mga kabatan-onang gustong mosulod sa maong isport.
Gihisgutan ni De Jesus ang maong isyu tungod sa nagkadugang nga pagkapopular sa tennis sa nasod, ilabina human sa sunod-sunod nga kalampusan sa Filipina tennis star nga si Alex Eala.
Matod ni De Jesus, nagpabiling hagit alang sa mga Pilipino ang pag-apil sa tennis tungod kay giisip gihapon kini nga bag-o ug “pang-mayaman” kumpara sa basketball ug volleyball, ilabina tungod sa mahal nga kagamitan ug pagbansay.
Matod sa PSC, ang mga “regional training center” makatabang aron mas mapaduol sa mga kabatan-onan sa nagkalain-laing rehiyon ang mga pasilidad alang sa pagbansay ug mapalambo ang kalidad sa mga bag-ong talento sa tennis sa nasod.
