GENERAL SANTOS CITY – Gibutyag ni Marcelino Valdez, sa Philippine Statistics Authority (PSA ) Sarangani and GenSan nga sa Oktobre hangtod sa mid-November magsugod na ang pick season sa ilang buhatan.
Matud pa niini sa maong mga bulan daghan ang aplikante nga gakuha og birth certificate, marriage certificate, death certificate og CENOMAR kon certificate of no marriage alang sa mga kaslunon.
Mas maayo nga karon magkuha sa mga naasoyng dokumento tungod medyo luag karon ang servicing center sa PSA og dili na paabuton ang Oktobre tungod magdasok na ang mga tao.
Sumala pa ni Valdez, sa karon anaa sa 600 hangtud sa 650 ang giserbisyohan sa matag adlaw nga dili mahurot sukwahi sa pick season nga alas 7:00 pa lang sa buntag mahurot na ang gihatag nga priority number tungod sa kadaghan sa aplikante.
Sa pamahayag sa maong opisyal kung walay brownout o dili usab maabtan og offline, makuha gilayon ang mga dokumento sa usa ka adlaw.
Gawas sa mall, pwedeng magkuha og mga certificates pinaagi sa online appointment kung asa sulod sa lima ka adlaw ipadala sa PSA sa courier aron malikayan ang hasol sa paglinya.
