Gikompirma sa Department of Foreign Affairs (DFA) nga nagsugod na ang proseso sa pagpauli sa Pinay drug mule convict sa Indonesia nga si Mary Jane Veloso.
Matod ni Foreign Affairs USec. Eduardo de Vega nga ang Department of Justice (DOJ) nitukod og team nga motabang sa DFA ug NBI nga makigsabot sa Indonesia kalabot sa proseso sa pagbalhin sa piniriso gikan sa laing nasod.
Gibutyag ni De Vega nga wala pa masayod si Mary Jane Veloso sa maayong balita bahin kaniya tungod wala pa sila mosulti sa maong balita kay dili pa kini opisyal.
Sa pagkakaron, ila pang giplantsa ang termino sa pagbalhin ni Veloso sa gobyerno sa Indonesia.
Nasayran nga si Presidente Bongbong Marcos mismo ang mikompirmar karong buntag nga papaulion na si Mary Jane sa Pilipinas, human nakahukom ang Indonesia nga ihatag ang physical custody ni Veloso ngadto sa Pilipinas.
Si Veloso napriso sa Indonesia niadtong 2010 tungod sa kasong pagpayuhot og droga ug gisentensiyahang kamatayon.
