Miingon si Akbayan Party-list Representative ug House Prosecutor Chel Diokno nga ang hangyo sa prosekusyon nga ipa-subpoena ang bank records, tax records, ug mga report sa Anti-Money Laundering Council (AMLC) ni Vice President Sara Duterte ug sa iyang bana nga si Atty. Manases “Mans” R. Carpio, makatabang sa pagpagawas sa tibuok kamatuoran sa kaso.
Matud ni Diokno, pinaagi sa maong mga dokumento, masuta kung adunay basehan ang mga alegasyon nga gilakip sa Article II sa Articles of Impeachment nga may kalabotan sa giingong unexplained wealth o dili maipasabut nga bahandi ni Duterte.
Dugang pa niya, ang maong mga rekord maoy mahimong lig-on nga ebidensya aron masuta ang mga isyung gipasaka batok sa Bise Presidente atol sa nagpadayon nga impeachment trial sa Senado.
Sa kasamtangan, wala pa’y pinal nga desisyon ang impeachment court sa hangyo sa prosekusyon nga ipa-subpoena ang maong mga rekord.
