Posibleng mahimong “surprise evidence” sa impeachment trial ni Vice President Sara Duterte ang mga dokumento ug testimonya gikan sa mga representante sa bangko nga wala pa makita sa publiko ug bisan sa mismong mga prosecutor. Kini ang tubag sa House Prosecution Panel sa pangutana kung adunay ba sila’y ebidensyang wala pa maibutyag sa publiko ug posibleng adunay dakong epekto sa resulta sa impeachment trial.
Matod kang lead prosecutor ug Batangas Representative Gerville “Jinky Bitrics” Luistro, bisan pa og lakip kini sa ilang gitawag nga “reservation list” o mga ebidensyang gitagana alang sa pagdungog, wala pa sa ilang kustodiya ang maong mga dokumento gikan sa bangko sa pagkakaron.
Gipasabot ni Luistro nga sa higayon nga magsugod na ang impeachment trial, magpagula ang Senate impeachment court og subpoena aron mapugos ang mga bangko sa paghatag sa maong mga rekord ug pagpatambong sa ilang mga opisyal sa korte.
Gilauman nga ang mga dokumento gikan sa bangko mahimong usa sa mga nag-unang ebidensya sa prosekusyon aron pamatud-an ang mga alegasyon sa gitawag nga “unexplained wealth” batok sa Bise Presidente.
