Respetuhon matod pa sa prosecution team ang bisan unsang desisyon sa Senate impeachment court bahin sa ‘voting threshold’ nga gamiton sa paghukom kang Vice President Sara Duterte sa iyang impeachment trial, sumala kang Akbayan Party-list Representative Chel Diokno.
Dugang pa ni Diokno, wala nakatutok ang prosecution sa gidaghanon sa mga boto nga gikinahanglan para sa conviction, kundili sa pagpresentar og lig-on nga ebidensiya aron suportahan ang ilang kaso batok kang Duterte.
Gitakda sa Martes, Setyembre 23, ang ‘oral arguments’ sa prosecution ug defense bahin sa ’16-vote threshold’ nga kasamtangang gitakda alang sa conviction ni Duterte.
Miinit ang isyu sa ‘voting threshold’ human mangayo ang Senate impeachment court og opinyon gikan sa mga kanhi mahistrado sa Supreme Court kung apil ba sa pag-ihap sa mga boto ang mga senador nga napriso, nagtago o naa sa ubang nasod.
Tulo sa upat ka mga eksperto sa balaod nga giimbitar isip ‘amici curiae’ ang nagpahayag nga posibleng usbon sa impeachment court ang kasamtangang ’16-vote threshold’ para sa conviction, base sa gahum sa Senado sa pagdungog ug pagdesisyon sa mga impeachment case.
Sa laing panan-aw, adunay mga nagtuo nga ang ‘two-thirds requirement’ nga gitakda sa Konstitusyon angay magpabilin nga nakabase sa kinatibuk-ang 24 ka miyembro sa Senado.
Apil sa mga senador nga kasamtangang dili aktibong nakapartisipar sa pagtaral sila Senador Jinggoy Estrada ug Senador Rodante Marcoleta, nga parehong na-detained may kalabotan sa managlahing mga kasong plunder.
Wala pa matino ang ginatagoan ni Senador Ronald “Bato” dela Rosa samtang adunay arrest warrant batok kaniya gikan sa International Criminal Court.
Samtang, naka-leave si Senador Loren Legarda ug kasamtangang naa sa ubang nasod.
Ang desisyon sa impeachment court bahin sa ‘voting threshold’ ang magtino sa gidaghanon sa mga boto nga gikinahanglan sa paghukom kang Duterte.
