Gipasabot ni Professor Mayong Aguja sa Mindanao State University–General Santos ang kamahinungdanon sa ikalimang State of the Nation Address (SONA) ni Pangulong Ferdinand Marcos Jr. isip basihan sa publiko sa pagsusi ug pagtan-aw sa performance sa administrasyon.
Matod ni Aguja, importante nga masayran sa katawhan dili lamang ang mga programa ug mga lakang nga gilatid sa Pangulo, kondili usab ang mga isyu nga wala mahisgoti sa iyang taho aron mas adunay lapad nga pagsabot sa tinuod nga kahimtang sa nasud.
Namatikdan usab sa propesor nga adunay pipila ka bahin sa SONA nga nakadawat og positibong tubag gikan sa mga nanambong sa plenaryo, nga gipakita pinaagi sa ilang pagpalakpak.
Apan, matod ni Aguja, daghan pa gihapong mga pangutana ang mahimong motumaw, ilabina sa pahayag sa Pangulo sa miaging SONA bahin sa mga flood control projects, diin iyang giingon nga adunay mga opisyal nga atubangon og kaso tungod sa giingong korapsyon.
Dugang pa niya, ang resulta sa mga mosunod nga lakang sa administrasyon maoy mahimong sukdanan kon matuman ba gayod ang mga programa ug mga saad nga gipahibalo sa Pangulo.
