Gipaabot nga mokunhod ang produksyon sa palay ug mais sa ikatulong kwarter sa 2026 kon itandi sa samang panahon niadtong 2025, base sa Philippine Statistics Authority o PSA.
Matud sa ahensya, ang gibanabana nga produksyon sa palay gikan Hulyo hangtod Septiyembre 2026 mokabat lamang sa 3.19 million metric tons, 15 percent nga mas ubos kon itandi sa 3.75 milyon metric tons nga aktuwal nga produksyon sa samang panahon niadtong 2025.
Gipaabot usab nga mokunhod sa 15.8 percent ang area nga maani sa palay ngadto sa 771,790 ektarya gikan sa 916,770 ektarya niadtong miaging tuig.
Samtang, ang produksyon sa mais gibanabana nga mokunhod og 14.4 percent ngadto sa 2.08 million metric tons gikan sa 2.43 milyon metric tons niadtong 2025.
Gipaabot usab nga mokunhod sa 12.8 percent ang area nga maani sa mais ngadto sa 688,030 ektarya gikan sa 789,240 ektarya sa miaging tuig.
Matud sa PSA, upat ka ‘tropical cyclone’ ang nakaigo sa sektor sa agrikultura gikan Hulyo hangtod sayong bahin sa Septiyembre.
Base sa final assessment sa Department of Agriculture, pinakadako ang kadaot ug kalugi sa palay nga mikabat sa P2.05 billion, samtang P127.60 million ang natala nga kalugi sa mais.
