GENSAN– Isip kabahin sa gipakusog nga pagmonitor sa seguridad karon alayon sa Semana Santa, mibisita si PBGen. Arnold P. Ardiente, Regional Director sa Police Regional Office 12 sa President Roxas Municipal Police Station kagahapon, Abril 17, aron susihon ang kaandam sa pag-obserba sa Semana Santa.
Atol sa maong pagbisita, gikuyogan ni PCol. Gilberto B. Tuzon, Provincial Director sa Cotabato Provincial PoliCe Office si RD Ardiente.
Sa ilang pag-abot, mainitong gi-welcome ang mga opisyal ni PMajor Jose Ryan B. Feramil, Officer-in-Charge sa President Roxas Municipal Police Station uban sa iyang mga personnel.
Ang inspeksyon nagpunting sa mga plano sa pagdeploy sa estasyon, kaandam sa pagtubag sa mga insidente, ug pakigtambayayong sa lokal nga komunidad ug mga stakeholder aron masiguro ang kaluwasan sa mga residente ug bisita sa panahon sa Semana Santa.
Gihatagan og gibug-aton ni Ardeinte ang kamahinungdanon sa police visibility sa mga dapit nga tigumanan, lakip na ang mga simbahan ug transport terminals, ug ang panginahanglan sa tanang personnel nga magpabiling alerto ug service-oriented sa tibuok holiday.
