GENERAL SANTOS CITY – Gihingusgan sa Regional Director sa Police Regional Office 12 nga si Police Chief Supt. Marcelo Morales nga ang gipahigayong sorpresang drug test ang kabahin sa kampanya sa Internal cleansing sa PNP.
Kahibaluan, gipatawag kagahapon ni Gen. Morales sa Tambler Regional Headquarter ang mga chief of police sa rehiyon dose alang sa conference ug sa meeting kalit niining gi-anunsiyo nga ipailawom ang mga nasampit sa drug test.
Matud pa ni Gen. Morales, tumong niini aron ipakita sa publiko nga wala nalambigit o gagamitan og gidiling droga ang mga pulis.
Sa iyang pamahayag, ang kapulisan ang tig-implementa sa war on drugs campaign sa gobyerno hinungdan nga mao ang angayang mahimong ehemplo.
Nasayran nga pangayuan ug written explaination ni Gen . Morales ang mga Chief of Police nga wala makasipot sa meeting.
Kinsa mang pulis nga magpositibo ang ‘subject’ sa administrative sanction kung asa dismissal o pagkatangtang sa serbisyo ang pinakabug-at nga silot.
Kahibaluan, mismong si Gen. Morales ang unang nagsumite ug urine sample ug misunod ang mga City og Provincial directors hangtud sa Chief of Police.
