Gipaabot ang dakong pagkunhod sa presyo sa mga produktong petrolyo sunod semana, ilabina sa diesel.
Base sa banabana nga gikonsiderar ang ‘Mean of Platts Singapore’ o MOPS ug ‘foreign exchange’ sa milabay nga upat ka adlaw, posibleng moubos og P7.00 hangtod P8.00 matag litro ang presyo sa diesel. Gilauman usab ang ‘rollback’ nga P0.50 hangtod P1.00 matag litro sa gasolina ug P5.00 hangtod P6.00 matag litro sa kerosene.
Matud sa usa ka tinubdan sa industriya sa lana, mikunhod ang presyo sa krudo tungod sa paglaom sa ‘diplomatic talks’ aron tapuson ang gubat tali sa Estados Unidos ug Iran, samtang nakatabang usab sa suplay ang pagbalik sa mga ‘shipments’ gikan sa Saudi Arabia.
Apan gipaabot gihapon ang pipila ka risgo nga mahimong mosaka pag-usab ang presyo tungod sa hinay nga pag-uswag sa ‘diplomatic talks’ ug bag-ong pag-atake sa Houthi gamit ang missile batok sa Saudi Arabia nga nagpabalik sa kabalaka sa posibleng problema sa suplay.
Ang opisyal nga ‘fuel price adjustments’ kasagarang ipahibalo matag Lunes ug ipatuman sa mosunod nga adlaw, Martes.
