Gipahibalo sa Department of Foreign Affairs o DFA nga posibleng mosaka ang presyo sa passport tungod sa hangyo sa APO Production nga tugotan kini sa pag-adjust sa presyo aron mapadayon ang produksyon.
Atol sa hearing sa 2027 budget sa DFA, giingon ni Senate Finance Committee Chair JV Ejercito nga gikan sa kasamtangang P950, gisugyot ang pagtaas niini ngadto sa P1,500.
Matod ni Ejercito, mahimong dakong kabug-aton kini ilabi na sa mga overseas Filipino workers o OFWs, bisan pa og adunay diskwento alang sa mga senior citizen ug ubang kwalipikadong aplikante, lakip ang OFWs nga mahimong mobayad og P1,200.
Samtang, gibutyag ni Foreign Affairs Secretary Maria Theresa Lazaro nga gusto sa DFA nga ipalangan ang bisan unsang pagtaas sa presyo hangtod sa tunga-tunga sa 2028. Matod ni Lazaro, ilang gikonsiderar ang pagpagawas sa sunod nga henerasyon sa passport nga mogamit og laing klase sa papel.
Gipangutana usab ni Ejercito ang DFA bahin sa mga report nga adunay passports nga dili mabasa sa electronic gates sa mga airport, diin sumala ni DFA Assistant Secretary for Consular Affairs Anne Jalando-on Louis nga isolated cases lamang kini.
Gidugang pa ni Jalando-on Louis nga naghimo ang DFA og technical working group ug nakigtambayayong sa APO aron masulbad ang isyu, samtang gitan-aw usab ang problema sa mga reader sa e-gates nga ubos sa Bureau of Immigration.
