Presyo sa pagkaon hugot nga ginabantayan sa gobyerno

Hugot nga gibantayan karon sa gobyerno ang presyo sa pagkaon tungod sa epekto sa taas nga presyo sa lana tungod sa nagpadayon nga gubat sa Middle East.

Kini gipahibalo ni Presidente Ferdinand Marcos Jr. atubangan sa padayon nga pagpangita og mga paagi aron maibanan ang palas-anon sa katawhan.

Sa usa ka ambush interview sa Presidente sa Bataan, siya miingon nga importante ang pagmonitor sa presyo sa mga palaliton tungod kay ang uban mahimong mopahimulos sa sitwasyon nga wala’y gihunahuna gawas sa pagkita og dako.

Tungod sa taas nga presyo sa lana, ang ubang mga pagkaon misaka usab sa presyo, busa kini ang gihimo karon sa gobyerno aron malikayan ang inflation.