GENERAL SANTOS CITY – Nitaas ang presyo sa karneng manok sa mga pwesto sulod sa merkado publiko dinhi sa dakbayan.
Kini ang pagkumpirma ni Eva Shoko, residente sa Lagao og adunay pwesto sa manokan sa City Public Market.
Matud sa nasampit, dies pesos ang pagsaka sa presyo sa karneng manok tungod nihit ang baligya dinhi sa mga suppliers sa dakbayan.
Sa pagkakaron, naa sa P140 kada kilo ang tiubok nga manok, ang choice cut- P145/kilo; drum stick P150/kl; liog-90/kl; atay-batikulon naa sa P150/kl og ang P120/kl ang tinae.
Gibutyag ni Shoko nga pipila sa mga kustomers ang gapangutana kon nganong niusbaw ang presyo sa karneng manok og kabahin sa bird flu virus.
Mismo sila nga mga gatinda ug manok sa palengke gipapha ang kabalaka sa ilang mga kustomers nga dili mahadlok tungod wala nakaabot ang maong balatian sa poultry animal dinhi sa dakbayan.
Samtang nagpahimangno si Dra. Tina Ramizo, usa ka pediatrician sa dakbayan ngadto sa publiko nga angayang mas mag-amping ning tungura luyo nga walay bird flu virus nga natala dini sa dakbayan human nga nadeklara ang outbreak niini didto sa Pampanga.
