Epektibo karong adlawa, Hulyo 14, ang pagtaas sa presyo sa pipila ka produktong petrolyo ilabi na ang diesel ug kerosene, sumala sa Department of Energy (DOE).
Samtang, ang presyo sa gasolina posibleng dili mausab o mosaka depende sa ipatuman sa mga kompanya sa lana.
Mao kini ang gitugotan nga price adjustment range sa DOE:
- Gasolina: rollback hangtod ₱1.00 o dugang-presyo hangtod ₱1.00 matag litro
- Diesel: mosaka og ₱2.62 hangtod ₱4.62 matag litro
- Kerosene: mosaka og ₱2.22 hangtod ₱4.22 matag litro
Gipasabot sa DOE nga mahimong magkalahi ang aktuwal nga pagtaas sa presyo depende sa matag kompanya sa lana.
Matud ni Energy Secretary Sharon Garin, nakaapekto sa presyo sa pandaigdigang krudo ang nagpadayon nga tensyon sa nagkalain-laing bahin sa kalibotan, lakip na ang hulga sa pag-agi sa mga barko sa Strait of Hormuz.
Tungod niini, misaka ang presyo sa lana sa internasyonal nga merkado nga adunay direktang epekto sa presyo sa petrolyo sa Pilipinas.
Una niini, nagbinayloay og missile ug drone attacks ang pwersa sa Estados Unidos ug Iran sa Gulf niadtong Domingo, nga misangpot usab sa pagsirado pag-usab sa Strait of Hormuz.
Gipahayag sa DOE nga posible nilang tangtangon ang price adjustment range sa sunod semana kung magpadayon ang grabeng pag-usab-usab sa presyo sa lana sa kalibotan. Imbis nga range, mahimong magtakda ang ahensya og maximum o minimum nga kantidad sa rollback o price hike depende sa dagan sa presyo sa krudo sa internasyonal nga merkado.
