Gitan-aw nga “makatarunganon” sa usa ka grupo sa mga mag-uuma ang gibanabana nga posibleng moabot sa P60 hangtod P62 ang presyo sa kada kilo sa bugas pag-abot sa Setyembre.
Sumala ni Magsasaka Partylist Chairman Atty. Argel Cabatbat nga bisan adunay pagtaas sa presyo, makatabang kini sa mga mag-uuma aron makabawi sa padayon nga pagmahal sa mga gasto sa produksiyon, labi na sa abono.
Apan iyang gipaklaro nga wala gihapon kini magpasabot og dako nga kita para sa mga mag-uuma kay nagpabilin nga mahal ang presyo sa mga farm inputs.
Sumala pa niya, kung magtipid sa abono, sigurado usab nga mokunhod ang ani nga makadaot sa ilang kita.
Naglaum ang grupo nga dili na molapas pa sa P60 hangtod P62 ang presyo sa bugas aron dili usab mabug-atan ang mga konsumidor.
Sumala kanila, ang tumong mao ang patas nga presyo para sa mga mag-uuma ug sa mga mamalitay.
Gipahayag usab ni Cabatbat ang iyang kahadlok sa padayon nga tensyon sa Middle East nga posibleng hinungdan sa domino effect sa pagtaas sa presyo sa mga palaliton.
