Wala gilauman nga mosaka ang presyo sa bugas bisan pa sa dakong pagsaka sa presyo sa mga produktong petrolyo nga gipatuman sugod niadtong Septyembre 8.
Gipahayag kini sa Department of Agriculture o DA, diin giingon ni DA spokesperson Arnel de Mesa nga nagpabiling lig-on ang presyo sa bugas sa mga merkado nga nagkantidad og P48 hangtod P55 matag kilo.
Matud ni De Mesa, maayo pa ang suplay o imbentaryo sa bugas sa nasod, busa wala pa gilauman nga maapektuhan sa pagsaka sa presyo sa gasolina ang presyo niini.
Dugang pa niya, bisan pa man adunay mga pagkalugi sa ani tungod sa upat ka bagyong miagi, wala pa gihapon makita ang epekto niini sa presyo sa bugas.
Una nang gipahayag sa Department of Energy o DOE nga ang dakong pagsaka sa presyo sa gasolina mahimong nalambigit sa misamot nga tensyon tali sa Estados Unidos ug Iran, lakip na ang padayon nga paghuyang sa piso batok sa dolyar.
