Nagtuo ang grupong Pork Producers Federation of the Philippines nga mous-os ang presyo sa karne sa baboy sa mosunod nga upat ka semana.
Matod sa presidente sa grupo nga si Rolando Tambago, ang panginahanglan alang sa karne sa baboy ning milabay nga holiday misaka pag-ayo kon itandi sa holiday demand sa 2023.
Human sa pagsaulog sa Pasko ug Bag-ong Tuig, nitaas usab ang panginahanglan alang niining kasaulogan sa Lunar New Year.
Hinuon, matod niya, gipaabot nga mokunhod ang panginahanglan sa ulahing bahin sa Pebrero ug sayong bahin sa Marso samtang nagkaduol ang Semana Santa.
Matod niya mao kini ang kasagarang mahitabo sa mga merkado sa Pilipinas.
Karong semanaha, ang ubang mga merkado nakakita na sa presyo sa baboy nga mokabat sa P460 matag kilo
Matod ni Tambago, ang maong presyo sukwahi sa P220 ngadto sa P225 matag kilo nga presyo sa farmgate, nga gikonsiderar nga ubos..
Una nang gitan-aw sa Department of Agriculture (DA) ang posibilidad nga ipahamtang ang labing taas nga presyo sa tingi sa karne sa baboy sa merkado tungod sa hapit dili mapugngan nga pagsaka sa presyo.
