GENERAL SANTOS CITY – Gisiguro sa Bombo Radyo ni Chief Undersecretary Joel Egco sa Presidential Task Force on Media Security (PTFoMS) nga istodyohan pag-ayo ang may kalabotan sa ‘frame up’ sa duha ka empleyado sa Bombo Radyo GenSan nga nag-ugat sa pyramiding scam issue sa KAPA (Kabos-Padatu-on).
Kahibaluan nga human mapadangat sa sibyahanan ngadto sa buhatan nga kinahanglan niining mag-intervene sa isyu, gilayong nagmugna og fact finding team aron tutukan ang isyu sa pag-harass kang Bombo Jan-jan Macailing og Bombo “Boi” Galano.
Matud pa ni Egco nga angayang sutaon kung unsa ang tinuod nga nahitabo kung asa mamahimong patas sila sa pag-imbestiga.
Sa pahayag sa opisyal, gituboy nga mututok sa isyu si Atty. JB Castro, PTFoMS chief investigator Retired Col. Rechie Duldulao og Capt. Ariel Paulino, head sa Armed Special Agents.
Imbestigahan usab sa gimugnang fact finding team ang kalambitan sa ubang mga law enforcement personnel sa kalihokan ni Joel Apolinario ang founder sa KAPA kon Kabos-Padatu-on.
Kini ang gibutyag ni Presidential Task Force on Media Security Chief Undersecretary Joel Egco sa pakighinabi sa Bombo RAdyo.
Matud niini, sutaon pag-ayo kung unsa kini katinuod pinaagi sa pagpangalap og mga impormasyon og ebidensiya.
Una nang gibutyag ni Usec. Egco nga human nga iyang nasayran ang nahitabo nakig-alayon siya sa mga miembro sa media sa GenSan.
Iyang nasayran nga dili makatuo ang mga nakaestorya niya sa pasangil nga gibato sa KAPA batok kang Bombo Jan-jan og Bombo “Boi” nga matud pa nangilkil.
Ang operasyon sa KAPA, nahimong subject sa commentary program sa Bombo Radyo GenSan nga padayong naghatag og pahimangno sa publiko gumikan usa ka matang kini sa pyramiding scam.
Sa bahin sa Surigao del Sur partikular sa Bislig kung asa unang nag-operate ang KAPA sa miaging tuig, gitumbok sa DTI nga ang KAPA ni Apolinario dili otorisadong mag-solicit og investments sa mga katawhan.
Bisan ang Security and Exchange Commission (SEC) nagpagawas og advisory niadtong pang Marso 2017 kung asa nag-warning usab sa operasyon sa KAPA.
