GENSAN- Samtang gikatakdang magsugod ang impeachment trial batok kang Vice President Sara Duterte karong Hulyo 6, gipatin-aw ni Atty. Xavier Bayan nga dili sa tanang higayon kinahanglan nga motambong personal ang Bise Presidente sa mga proceedings sa impeachment court.
Matod niya, sa ordinaryong mga kaso sa korte, kasagaran gikinahanglan ang presensya sa akusado ilabina kung adunay mga testigo nga moila kaniya.
Apan sa impeachment trial, giingon niyang posible nga dili na kinahanglan ang personal nga pagpakita sa Bise Presidente tungod kay wala nay isyu sa iyang identidad.
Dugang niya, mahimo usab nga mouyon ang depensa aron i-dispensa ang iyang presensya ug ipadayon na lamang ang presentasyon sa mga ebidensya.
Nagpasabot si Bayan nga mahimo kining hisgutan ug sabutan sa duha ka panig isip kabahin sa proseso sa impeachment. Busa, dili awtomatikong nagpasabot nga kinahanglan motambong sa matag higayon ang Bise Presidente atol sa pagdagan sa impeachment trial.
