GENERAL SANTOS CITY – Mibalibad nga tawagon ug ‘fake news’ apan gihingusgan sa mayor sa Cotabato City nga kadudahan ang migawas nga taho gikan matud pa sa Singapore, kalabot sa presensya sa ISIS sa ilang lugar.
Sa pakighinabi sa Bombo Radyo kang Mayor Frances Cynthia Guiani, gihingusgan niini nga bakakon ug dili katuuhan ang tinubdan sa naasoy’ng balita.
Nasayran nga base sa migawas nga taho, may lima ngadto sa 10 ka tawo matud pa ang minaog sa ilang lugar, ug nagwagayway ug flag sa ISIS atubangan sa usa ka unibersidad, samtang nagpadayon ang klase.
Matud ni Guiani, walay kamatuuran ang naasoy’ng taho ug bakakon ang nagpagawas sa naasoy’ng taho nga giilang si Amy Chiu.
Sumala pa nga igo lamang nadunggan sa nasampit nga tinubdan ang taho, ug walay gihimong pagkumpirma o pagpangutana gikan sa kapulisan.
Hinungdan nga gilayon matud pa silang nagpatawag ug panagpulong kauban ang kapulisan ug kasundaluhan, ug gihisgutan ug klaruhon ang naasoy’ng taho.
Bisan paman, gitambagan ni Mayor Guiani ang iyang mga konstituwente nga dili gihapon tangtangon ang pagka-vigilante ug mabinantayon, apan likayan ang pagpakatag ug mga sayop nga balita ug taho.
