Nipasalig ang pamunoan sa Department of Social Welfare and Development nga padayon nilang gihingusgan ang ilang mga lakang sa pagpangandam sa mga katalagman.
Apil na niini ang pagpalig-on sa prepositioning sa family food packs sa mga bahin sa Mindanao. Base sa datus sa ahensya, ang Visayas Disaster Resource Center naka-deliver na og 13,300 ka kahon sa family food packs gikan sa Mandaue City, Cebu area paingon sa Northern Mindanao.
Gipasabot sa ahensya nga kabahin kini sa gipalapdan nga mga lakang aron masiguro nga dali nga mahatud ang mga hinabang sa mga residente ug pamilya nga apektado sa mga kalamidad.
Base sa datos nga gipagawas sa ahensya, niabot na sa 52,100 ang kinatibuk-ang ihap sa mga family food packs nga na-deliver sa rehiyon sa CARAGA.
Kalabot niini, gisubli sa DSWD nga igo na ang 3 milyon nga food packs nga gipreposisyon sa tibuok nasod. Gipaabot usab nga masiguro ang kaandam sa ahensya sa paghatod sa mga hinabang sa nagkadaiyang dapit sa Pilipinas.
