Diskriminasyon ug supak sa Olympic values ang desisyon sa World Athletics sa pagtanyag og premyo nga salapi sa mga gold medalist sa sunod bulan nga Paris Olympics sumala presidente sa European Olympic Committees nga si Spyros Capralos.
Kini human mipahibalo ang World Athletics (WA) ug ang International Boxing Association (IBA) nga gantihan ug salapi ang ilang kaugalingong mga medalist.
Ang WA magtanyag og $50,000 nga premyo nga salapi ngadto sa 48 ka Olympic champions niini sa Paris.
Apan dili motanyag og cash prize sa silver ug bronze medalist apan gipaklaro nga mutanyag na kini ug cash prize sa silver ug bronze medalist sa Los Angeles Olympics sa 2028.
Samtang ang IBA nagkanayon nga motanyag usab kini og kuwarta sa tanang medalist, nga adunay $100,000 sa gold medal, $50,000 sa silver medal ug $25,000 sa bronze.
Kini nga mga desisyon nakapasuko sa ubang mga internasyonal nga pederasyon ingon man sa IOC, nga matud pa usa ka direkta nga pagpanghilabot sa ilang kalihokan nga wala’y konsultasyon.
