Mitabang ang Philippine Red Cross (PRC) sa 3,792 ka mga indibidwal atol sa Holy Week Operations 2025, diin 3,508 niini ang mipailawom sa vital signs monitoring, 269 ang gitambalan alang sa minor cases, 8 ang giklasipikar nga major cases, ug 7 ang gidala sa medical facilities.
Ang welfare assistance gihatag usab ngadto sa 295 ka mga tawo lakip ang psychological support, referrals, ug libreng tawag.
Ang gagmay nga mga kaso naglakip sa mga samad, sakit sa tiyan, pinaakan sa insekto, pagkalipong, kahuyang, ug uban pang mga kondisyon sama sa kasukaon ug paghubag.
Samtang sa major cases, adunay kombinasyon sa pagpaminnhod uban sa pagkalipong, daghang mga samad, ug dislocation.
Kadtong gidala sa ospital adunay mga kaso sama sa grabe nga kasakit, pagkawala sa panimuot, ug mga samad sa agtang.
Aron mahimong epektibo ang serbisyo, ang PRC mipakatag og 57 ka ambulansya, 19 ka service vehicle, 3 rescue boats, 225 first aid stations, ug 722 personnel (80 staff ug 642 volunteers).
Ang PRC adunay halapad nga coverage sa mga estasyon sa 22 ka mga chapters, 87 ka simbahan, 38 ka highway points, 19 ka baybayon, 16 ka pantalan, 13 ka pilgrimage site, ug uban pang importante nga mga dapit.
