GENERAL SANTOS CITY – Miapela karon og pag-ampo ang Parish Pastoral Council for Responsible Voting kon PPCRV sa publiko alang sa kaluwasan ni Father Teresito “Chito” Suganob human nga migawas ang balita nga lakip sa gidagit sa mga Maute group sa pagpangataki sa Marawi.
Matud pa ni PPCRV coordinator Edwin Doyo, si Father Chito mao ang PPCRV Coordinator for Marawi og Lanao kon asa dugay nga panahon na niyang nakauban sa mga trainings og seminars nga gipahigayon sa PPRCRV-National level.
Gibutyag ni Doyo nga wala silay kahibalo kon asa na gidala si father Chito og wala usab naka-establisar ug kontak. Apan sa mga report nga nadunggan nga may upat ka kauban si Father Chito nga gidagit usab kon asa usa niini mao ang sekretarya sa obispo og tulo ka parokyano.
Nanghinaut nga walay kamatuoran ang mga text nga iyang nadawat nga gipatay na matud pa ang mga nasampit apan wala pay kumpirmasyon ang mga otoridad niini.
May migawas usab nga mga balita nga nihangyo ang mga terorista nga ipatuman ang ceasefire tungod kon dili, patyon niini ang mga bihag.
Sa pahayag ni Doyo, usa ka maayong tao si Father Chito kon asa joker og malipayon kanunay.
