GENERAL SANTOS CITY-Gikumpirma ni Army Captain Arvin Encinas ang tigpamaba sa 6th Infantry Division, Philippine Army nga hugot nilang gibantayan ang posibleng padayon nga pag-recruit sa Bangsamoro Islamic Freedom Fighters ilabina sa mga kabatan-unan.
Matud ni Encinas, pipila ka adlaw ang milabay dihang pagsugod sa engkwentro sa Marawi City ilang namonitor ang paspas og kaylap nga recruitment sa BIFF.
Ug gani, padayon nilang gimonitor kon aduna pay on-going recruitment nga ginahimo ang maong grupo ilabina nga dili limod nga daghang miyembro nila ang napatay sa engkwentro.
Panawagan sa kasundaluhan sa mga ginikanan nga giyahan ug tarong og bantayan pag-ayo ang ilang mga anak basin ma-recruit og maaghat nga musulod sa grupo sa BIFF.
Samtang gibutyag ni Army Captain Encinas, nagpabilin nga hapsay og walay problema sa pagpatuman sa mga proyekto sa mga lugar nga sakop sa 6th ID gilangkoban sa Sultan Kudarat, Maguindanao, North Cotabato, M’lang og Lanao del Sur.
