GENSAN-Sa nagpadayong confirmation of charges proceedings batok kang kanhi Pangulong Rodrigo Roa Duterte sa International Criminal Court o ICC, giingon sa abogado nga si Atty. Luis Salazar nga dili mahimong depensa ang pag-angkon nga popular gihapon ang usa ka lider bisan pa og adunay mga alegasyon batok kaniya.
Sa usa ka interbyu, gipangutana si Salazar kabahin sa posibilidad nga gamiton sa depensa, lakip na ni Atty. Nicholas Kaufman, ang argumento nga bisan pa sa daghang namatay atol sa kampanya kontra droga, nagpabilin gihapon ang suporta sa katawhan kang Duterte tungod kay nakita kuno sa publiko nga nahimong mas malinawon ang kahimtang sa nasud ug daghang drug surrenderers ang mitahan.
Apan sumala ni Salazar, sa usa ka husay, dili sukdanan ang popularidad aron maabswelto ang usa ka akusado.
Iyang gipatin-aw nga kon ang usa ka tawo giakusahan og pagpatay, dili mahimong basihan nga daghan ang nahigugma o misuporta kaniya aron mapapas ang krimen nga giingong nahitabo.
Gihulagway niini ang maong argumento isip usa ka “appeal to emotion” o pagdani sa emosyon sa publiko, nga dili direktang motubag sa ligal nga isyu nga ginahisgutan sa korte.
Matod niya, bisan pa og pabor ang pamilya sa biktima sa akusado, dili niini mausab ang kamatuoran nga adunay namatay ug kinahanglan kining tubagon base sa ebidensya.
Dugang pa niya, mahimo kining ikonsiderar nga dugang nga argumento sa depensa apan dili kini ang pinakapundasyon sa kaso. Gikumpara pa gani niya kini sa usa ka “side dish” lamang ug dili mao ang “main course” sa paghusay.
Sa kasamtangan, ginabista sa ICC Pre-Trial Chamber kon aduna bay igo nga basehan aron ipadayon sa trial stage ang mga kaso nga may kalabutan sa kampanya kontra ilegal nga droga sa administrasyon ni Duterte.
Ang confirmation of charges maoy kritikal nga yugto sa proseso aron matino kon adunay sapat nga ebidensya nga magpadayon sa pormal nga pagdungog sa kaso.
Padayon nga gibantayan sa publiko ug sa internasyonal nga komunidad ang kalamboan sa maong proseso samtang naghulat sa desisyon sa korte kon ipasaka ba ngadto sa sunod nga hugna ang kaso batok sa kanhi presidente.
