Nanawagan si Pope Leo XIV nga undangon na ang gubat sa Ukraine ug respetuhon ang international humanitarian law tungod sa nagkadaghang sibilyan nga namatay ug nasamdan.
Sa iyang mensahe atol sa Angelus prayer, gihangyo sa Santo Papa nga hunongon ang mga pag-atake batok sa mga inosenteng tawo, ilabina sa mga bata.
Base sa datos sa United Nations, kapin 16,000 ka sibilyan na ang namatay sulod sa hapit upat ug tunga ka tuig nga gubat tali sa Ukraine ug Russia.
Samtang, padayon usab ang mga drone attack sa Ukraine batok sa Russia, diin adunay mga sibilyan nga naapektuhan.
Sa pinakabag-o nga insidente, napinsala ang Odesa seaport human sa overnight Russian attack ug walo ang nasamdan.
Sa Russia, lima usab ang namatay sa overnight Ukrainian drone attack sa Belgorod, sumala sa regional crisis center.
