Gidayeg ni Pope Leo XIV ang kasaysayan sa United States sa pagdawat sa mga imigrante ug gi-awhag ang nasod nga magpabiling matinumanon sa mga mithi niini human makab-ot ang kagawasan gikan sa mga mananakop.
Pinaagi sa usa ka video message gikan sa Vatican City, gidawat ni Pope Leo ang Liberty Medal gikan sa National Constitution Center sa Philadelphia. Didto iyang giingon nga ang pulong nga “America” nahimong simbolo sa kagawasan sa tibuok kalibotan tungod sa pagka-abli niini sa mga imigrante.
Giawhag sa Santo Papa ang Estados Unidos nga ipadayon ang mga prinsipyo nga gilatid sa Declaration of Independence, ilabina sa nagkaduol nga ika-250 nga anibersaryo sa kagawasan sa nasod.
Matod niya, importante nga magpabiling giya sa Amerika ang panaghiusa, hustisya, ug kalinaw nga gipasiugdahan sa mga founding fathers.
Gipasiugda usab ni Pope Leo ang kamahinungdanon sa pagpanalipod sa kinabuhi sukad sa pagsabak hangtod sa natural nga kamatayon. Matod niya, ang moral nga kalig-on sa usa ka nasod masukod sa paagi sa pag-atiman niini sa mga huyang ug mga dinaugdaug.
Bisan wala niya hinganli si U.S. President Donald Trump o uban pang lider, nahinumdoman nga kaniadto gisaway sa Santo Papa ang pipila ka polisiya bahin sa imigrasyon nga iyang gihulagway nga dili makatawhanon.
Si Pope Leo, nga lumad sa Chicago, wala pa makabalik sa Estados Unidos sukad napili siyang Santo Papa niadtong 2025, apan nagpadayon siya sa pag-apil sa pipila ka mga kalihokan pinaagi sa video message.
