Gitambagan sa mga doktor si Pope Francis nga mopahulay og dugang duha ka buwan aron hingpit nga mamaayo ang iyang lawas. Kini bisan og mipauli na ang Santo Papa sa Vatican human sa 38 ka adlaw nga pagpabilin sa Gemelli hospital sa Roma.
Tungod niini, dili sigurado ang mga matuuhon kung kanunay ba nila makita sa publiko ang 88-anyos nga Santo Papa.
Gikan sa paggawas niya sa ospital, midiretso siya sa Casa Santa Marta, usa ka gamay nga bilding sa Vatican nga iyang gipuy-an sukad nahimong Santo Papa niadtong 2013.
Ang nasangpit nga pasilidad mao lamang ang pinuy-anan sa mga pari nga nagtrabaho sa Vatican diin gidid-an ang pagsulod sa mga bisita.
Dili segurado ang Vatican kon madayon ba sa Abril 8 ang personal nga pakigtagbo sa Santo Papa uban ni King Charles ug sa Abril 20 kini mangulo sa tinuig nga selebrasyon sa Pasko sa Pagkabanhaw.
