Dili pa makadugang og bag-ong teaching positions ang Department of Education o DepEd sa tuig 2027 kung magpabilin ang kasamtangang proposed budget, human ma-zero out ang pondo alang sa pag-recruit og mga bag-ong magtutudlo.
Kini ang gikumpirma ni Education Secretary Sonny Angara atol sa hearing sa House Committee on Appropriations niadtong Lunes.
Matud ni Angara, mokabat sa 14,274 ang gikinahanglang dugang nga mga magtutudlo sa DepEd, nga nagkinahanglan og gibanabanang P4.29 bilyon.
Apan, walay napag-isang pondo alang niini ubos sa 2027 National Expenditure Program o NEP.
Sumala sa kalihim, apil ang maong kantidad sa dugang nga P49.16 bilyon nga gihangyo sa DepEd alang sa ilang personnel improvement program.
Bisan pa niini, naglaum si Angara nga maibalik ang pondo samtang nagpadayon ang deliberasyon sa proposed national budget.
Matud niya, nakahire na ang DepEd og 32,000 ka mga magtutudlo karong 2026, mas taas kumpara sa kasagarang 20,000 ka bag-ong magtutudlo nga nadugang kada tuig.
Samtang, mokabat sa P976 bilyon ang pondo nga nakapaloob sa proposed 2027 budget alang sa DepEd.
Naghangyo usab ang kagawaran og dugang nga P145.19 bilyon alang sa mga programa nga wala mahatagi og igo nga pondo ubos sa NEP.
Tungod kay anaa pa sa proseso sa deliberasyon sa Kongreso ang 2027 national budget, posible pa nga mausab ang alokasyon alang sa hiring sa mga bag-ong magtutudlo.
