POLOMOLOK- Nagplano ang lokal nga panggobyerno sa Polomolok, South Cotabato nga palig-onon pa ang seguridad sa mga eskwelahan aron mapanalipdan ang mga estudyante ug mga magtutudlo batok sa posibleng hulga, lakip na ang mga school online threats.
Matud ni Polomolok Mayor Bernie Palencia, lakip sa ilang mga lakang ang paggamit og metal detectors ug pagpalig-on sa presensya sa Philippine National Police o PNP sulod ug palibot sa mga eskwelahan.
Gipalig-on usab ang koordinasyon tali sa lokal nga panggobyerno, barangay officials, Barangay Peacekeeping Action Teams o BPATs ug mga barangay tanod isip dugang nga pwersa sa pagpatuman sa seguridad.
Sumala ni Palencia, kinahanglan usab nga matutokan ang mga eskwelahan nga adunay abri nga mga lugar nga mahimong agianan sa mga dili awtorisadong tawo.
Matud pa niya, hinay-hinay nga paderan ang mga eskwelahan gamit ang pondo gikan sa General Fund ug Special Education Fund.
Gihisgutan usab ni Palencia nga human sa insidente sa pagpamusil sa Banga National High School, nakigtambayayong sila sa mga school heads ug principals aron maila ang dugang nga mga lakang ug pwersa nga makatabang sa pagmintinar sa seguridad, kalinaw ug kahapsay sa matag eskwelahan.
