GENERAL SANTOS CITY – Gibulabog sa bomb scare ang Polomolok, South Cotabato kagabii, human may namatikdan nga kadudahang container atubangan sa usa ka appliance center, sa may palengke sa national highway.
Paspas nga mikatag sa social media partikular na sa Facebook ug sa mga texts, ang mga taho nga may mibusikad nga bomba sa nahisgutang lugar.
Kahibaluan nga gilayong miresponde ang EOD sa nasampit nga lugar, kung asa nasuta nga lamang ka container sa basura ang nahisgutang butang.
Samtang, ang mibusikad matud pa nga nadunggan sa katawhan pasado alas-10:00 kagabii ang gumikan lamang sa pagdisrupt sa mga taga-EOD sa maong butang, apan giklaro nga walay IED component sila nga nakita.
Kahibaluan nga daghan ang nagpanic human mikatag ang naasoy’ng bomb scare, hilabi na nga bag-uhay lamang nahitabo ang pagpamomba sa Isulan, Sultan Kudarat.
Hinuon, kahibaluan nga tungod sa naasoy’ng panghitabo, mas gipahugtan ang seguridad sa lugar, apil na sa uban pang mga kasikbit lugar apil na ang GenSan.
Dungan niini, nagpahimangno ang mga otoridad ngadto sa publiko batok sa pagpakatag ug mga sayop nga balita, nga sagad nga magresulta ug kahadlok sa publiko.
Samtang, subling gipahinumduman usab ang katawhan nga kon ugaling may makita nga mga kadudahang butang o tawo, gilayong i-report sa mga otoridad aron gilayong maaksyunan.
