GENERAL SANTOS CITY – Nagpadayon ang ginahimong imbestigasyon sa National Bureau of Investigation – Sarangani District Office (NBI-SarDO) may kalabutan sa kalit nga pagkawala ni Patrolwoman Kristine Joy Rojas, nga gikaingong may kalambigitan sa dul-an P2 billion Police Paluwagan Movement o PPM scam.
Sa pakigsusi sa Bombo Radyo GenSan sa NBI, gikabutyag nga naglisod karon ang ilang mga imbestigador kung asa pangitaon ang naasoy’ng pulis.
Kahibaluan nga base sa report, sakay matud pa sa iyang motorsiklo si PO1 Rojas ug pauli na gikan sa PNP 12 Headquarters sa Brgy Tambler ning siyudad kaniadtong Marso 27, apan wala na nakauli sa iyang boarding house sa Brgy Fatima.
Sukad niatdo, dili na usab matud pa ma-contact ang cellphone number sa nasampit nga pulis.
Una niini, kahinumduman nga migawas ang pangalan ni Rojas isip escort-bodyguard sa listahan sa mga pulis ug sibilyan nga nalambigit sa kontrobersyal nga multi-bilion peso investment scam.
Samtang nagtanyag na usab ang iyang pamilya ug P250,000 reward money alang sa kinsa man nga makahatag ug impormasyon kalabot sa gikahimutangan ni PO1 Rojas.
