GENSAN- Nagpahigayon og room-to-room dialogue ug information dissemination ang Police Station 2 ubos sa pagpanguna ni PMaj. Ari Noel H. Cardos, Station Commander, uban sa mga personnel niini sa mga estudyante sa Labangal National High School sa Barangay Labangal, General Santos City sa mikalabayng adlaw.
Gipunting sa maong kalihokan ang pagpalig-on sa kahibalo ug kaandam sa mga estudyante kung unsaon pag-ila sa posibleng hulga ug hustong paglihok atol sa mga emergency nga sitwasyon.
Gipadayag sa kapulisan ang kahinungdanon sa pagpabiling kalmado, pagkamabinantayon ug pagsunod sa mga safety protocols panahon sa emerhensiya.
Gipahinumdoman usab ang mga estudyante nga ireport dayon sa school authorities ug kapulisan ang bisan unsang kaduda-dudahang kalihokan o persona.
Pinaagi sa maong inisyatiba, padayon nga gipalig-on sa Police Station 2 ang pakigtambayayong niini sa mga eskwelahan ug komunidad aron mapalambo ang usa ka luwas, hapsay ug andam nga learning environment alang sa tanang estudyante.
