GENERAL SANTOS CITY – Mukabat sa 500 ka mga pulis ang miapil sa via crusis o 14 Stations of the Cross karong buntag, nga tinuig nga ginapahigayon sa Police Regional Office 12, matag Biyernes Santo.
Nagsugod ang prusisyon alas-4:30 sa kaadlawon sa Diversion Road gikan sa GenSan International Airport, padulongh sa Regional Headquarters Police Regional Office 12 sa Brgy Tambler ning siyudad.
Sukwahi sa naadnan, wala nakaapil si Police Chief Supt. Marcelo Morales, Regional Director sa Police Regional Office 12.
Kahibalua nga sa mga nakalabay’ng katuigan, ginapangunahan sa regional director ang prusisyon, kung sila sila mismo ang gapas-an ug dagkong krus, sama sa gihimo sa mga nangaging PNP regional director.
Apan miapil sa prusisyon silang Senior Supt. Johnson Almasan, deputy director for operations, ug Police Supt. Aldrin Gonzales, chief PIO sa PRO-12 ug nagpas-an ug krus, samtang nagsunod ang uban pang mga ginsakpan nga nagpas-an usab ug mas gagmay’ng krus.
Nahuman ang prusisyon sa 14th station nga anaa sa PRO-12 Regional Headquarters, nga gisundan sa gipahigayong misa sa ilang kapilya.
