GENSAN- Nagpagawas og pahimangno ang Philippine National Police – Regional Anti-Cybercrime Unit (RACU) ngadto sa publiko nga magbantay batok sa mga scammer ug sa mga tawo nga nagpakaylap og fake news, disinformation ug sayop nga impormasyon, ilabina sa panahon sa kalamidad ug emerhensya.
Sumala kang PMAJ Mark Gerald A. Norbe, importante nga mahimong mabinantayon ang matag usa ug sigurohon nga gikan lamang sa opisyal ug kasaligan nga mga tinubdan ang impormasyon nga ilang ginatuohan ug ginapaambit sa ubang tawo.
Gipasidan-an usab sa RACU nga ang pagpakaylap sa walay basehan nga impormasyon mahimong makahatag og kalibog ug kahadlok sa komunidad ug makabalda sa mga operasyon sa gobyerno panahon sa krisis.
Busa, gihangyo sa kapulisan ang publiko nga magtinabangay sa pagsumpo sa pagpanglimbong, fake news ug misinformation aron mapadayon ang kalinaw, kaluwasan ug hustong impormasyon alang sa tanan.
