GENERAL SANTOS CITY – Gipalagpot na ang PNP provincial director sa Sultan Kudarat ug hepe sa Isulan Municipal police station human ang sunod-sunod nga pagpamomba sa nahisgutang lugar, kung asa duha na ang natala nga patay sa labing ulahi nga nahitabo kaniadtong Dominggo sa gabii.
Matud kang C/Supt. Eliseo Rasco ang bag-ong regional director sa PRO-12, human sa insidente miaging gabii, gilayong gi-relieve si P/Supt. Celestino Daniel ug gihulipan ni P/Supt Junie Buenacosa.
Gitangtang usab sa puwesto ang provincial director nga si S/Supt. Noel Kinazo.
Kahibaluan nga ang naasoy’ng kamanduan ang naggikan mismo kang PNP chief Director General Oscar Albayalde nga kasamtangang atua sa Brunei ug mitambong sa 38th ASEANAPOL Conference.
Una nang giulan ug mga pagsaway ang pagpatuman sa seguridad sa Isulan human sa naunang pagpamomba kaniadtong Agosto 28, 2018 nga gikamatay sa tulo ka tawo, ug gikaangol sa kapin 30 ka tawo.
Ug misamot pa dihang nasundan kini kaniadtong Dominggo sa gabii.
