Miduyog sa pagpangita ang Philippine National Police (PNP) kang kanhi presidential spokesperson Harry Roque kinsa ginapadakop human gi-contempt sa quad committee sa House of Representatives tungod sa kapakyas sa pagsumite sa mga dokumento nga may kalabotan sa iyang bahandi nga nalambigit sa ilegal nga operasyon nga POGO.
Wala tumana ni Roque ang iyang saad sa pagsumite sa mga dokumento, ug wala usab motambong sa quad committee hearing.
Niadtong Biyernes, ang mga awtoridad miadto sa law firm ni Roque sa Antel Corporation Center sa Makati City aron i-serve ang warrant of arrest apan wala mudawat ang iyang mga sakop .
Wala usab nakita si Roque sa maong dapit. Si Roque gitumbok nga ‘contempt’ human napakyas sa pagsumite sa kopya sa iyang Statements of Assets, Liabilities, and Net Worth, records sa Biancham Holdings, nga gipanag-iya sa iyang pamilya ug mga pruweba sa halin sa property sa Parañaque City nga matud niya maoy tinubdan sa iyang kalit nga pagsaka sa iyahang bahandi.
Human ma-contempt, ang komite niluwat og arrest order batok kang Roque.
Ang giingong wa pakig-alayon ni Roque sa quad committee nagpalig-on lang sa pasangil nga duna siyay gitagoan ug may kalambigitan siya sa operasyon sa ilegal nga POGO.
Ang tabang sa PNP sa pagpangita kang Roque giingong nagpakita nga seryoso ang imbestigasyon nga gihimo sa quad committee.
Samtang giawhag ang publiko sa pagtabang sa pagpangita kang Roque.
Kahinumduman nga giangkon ni Roque nga iyang giubanan si Katherine Cassandra Ong sa PAGCOR aron ayuhon ang problema sa Lucky South 99 Pogo hub ug mihimakak nga siya ang abogado sa Lucky South 99 nga bag-o lang gironda sa mga otoridad.
