Naka heightened alert ang Philippine National Police (PNP) kalabot sa gipaabot nga protesta atol sa nagpadayon nga hearing sa International Criminal Court (ICC) batok kang kanhi Presidente Rodrigo Duterte.
Sumala ni PNP Chief Jose Melencio Nartatez Jr., ang tanang yunit sa pulisya gibutang sa heightened readiness ug kasamtangang nagmonitor sa posibleng dagkong mga panagtapok aron masiguro ang kaluwasan sa publiko. Miingon siya nga bisan unsa pa ang partido o grupo, ang pulisya nagbantay aron mapanalipdan ang ilang mga katungod ug mapadayon ang kalinaw ug kahusay.
Niining bahina, gimandoan usab sa hepe sa PNP ang mga regional yunits nga mag-deploy og mga Civil Disturbance Management (CDM) team ug sigurohon nga ang mga medical emergency responder anaa sa standby kung adunay dagkong mga panagtapok.
Bisan pa man nga iyang gipasiugda ang pagtahod sa katungod sa mga lungsuranon sa pagpahayag sa ilang mga opinyon, si Nartatez miingon nga ang prayoridad sa PNP mao gihapon ang kaluwasan sa publiko. Sumala niya, ipatuman ang maximum tolerance, apan ang tanang mga opisyal sa pulisya gimandoan nga magpabiling propesyonal ug likayan ang bisan unsang komprontasyon ug mosunod sa balaod.
Samtang, nanawagan ang PNP Chief sa mga kritiko ug tigpaluyo ni Duterte nga magpabiling kalmado ug dili tugotan nga madaog sila sa emosyon, nga mahimong mosangpot sa kapintasan o kalapasan sa balaod.
Karong adlawa ang ICC sa The Hague magsugod sa upat ka adlaw nga pre-trial nga “confirmation of charges” hearing batok kang Duterte tungod sa giingong mga ‘ crimes against humanity’ nga may kalabotan sa iyang kampanya nga ‘war on drugs’ . Ang hearing maoy motino kon aduna bay igong ebidensya aron ipadayon ang husay.
