SOUTH COTABATO– May gimugna nga Special Investigation Task Group (SITG) ang kapulisan aron paspas ang pagresolba sa natigayong pagpatay sa Vice mayoral aspirant sa Tantangan, South Cotabato nga si E-Barangay Bukay-pait Chairman Jose Osorio.
Matod kang PCol. Samuel Cadungon, Provincial director sa South Cotabato, tumong sa task group nga madali ang imbestigasyon og mailhan ang mipatay kang Osorio.
Kini human usab sa gibutyag ni South Cotabato 2nd district Rep. Peter Miguel nga maghatag kini og P1 million reward money sa kinsa mang makahatag og impormasyon aron mailhan og madakpan dayon ang responsable sa krimen.
Dugang pa ni Cadungon, usa sa mga anggulo nga gitan-aw sa kapulisan mao ang land conflict tungod dugay na matod pang may kabangi sa yuta ang biktima kung asa may mga gipasaka kini nga kaso sa korte.
Apan, wala gihapon gitangtang ang motibong pulitika tungod sa kandidato kini sa pagka-bise mayor sa Tantangan.
Sa karon, wala pay gianunsyo ang kapartido niini kung kinsa ang ihulip kaniya isip ka-tandem ni Former Mayor Benjamin Figueroa alang sa 2025 Elections.
