Nag-andam na ang Philippine National Police o PNP sa mga gikinahanglang security measures alang sa duha ka adlaw nga transport strike karong Setyembre 14 ug 15 nga pagahimuon sa grupong MANIBELA isip protesta sa padayong pagsaka sa presyo sa lana.
Matud ni PNP chief Gen. Jose Melencio Nartatez Jr., gipataas na ang alerto sa mga police unit sa mga lugar nga gipaabot nga tapokan sa mga nagprotesta, lakip na ang bahin sa Philcoa sa Quezon City.
Gimandoan usab ang mga police chief ug territorial units nga hugot nga makigkoordinar sa mga lokal nga panggamhanan ug uban pang ahensya sa gobyerno aron mapadayon ang seguridad ug hapsay nga pagdumala sa mga panon sa mga tawo.
Nagtukod usab ang PNP og koordinasyon aron makatabang sa mga commuter nga posibleng ma-stranded sa kadalanan tungod sa ‘tigil-pasada’.
Matud ni Nartatez, nasabtan sa national police ang kabalaka sa mga transport group tungod kay apektado usab sa padayong pagsaka sa presyo sa gasolina ang ilang mga personnel nga nagmaneho.
Gipaabot sa PNP nga magpabiling malinawon ug hapsay ang mga protesta, apan andam gihapon ang dugang nga security forces kung adunay wala damhang emergency o laing insidente.
