Nipasalig ang Philippine National Police (PNP) nga luwas nga makabotar ang mga Filipino citizen sa adlaw sa piniliay karong umaabot nga Lunes.
Kini ang gipahayag ni PNP Chief PGen. Rommel Francisco Marbil ngadto sa publiko nga ang ilang han-ay ang magseguro sa iyang kaluwasan sugod karong adlawa.
Matod ni Marbil nga dili angay mabalaka ang publiko tungod kay ania ang kapulisan ug andam silang panalipdan ug ang ilang mga boto sa adlaw sa piniliay.
Gipasalig usab sa hepe nga anaa na sa full-force deployment ang ilang han-ay sugod karong adlawa aron masiguro ang kaluwasan ug kahapsay sa tibuok nasud pipila ka adlaw sa dili pa ang piniliay.
Matud pa usab niya nga base sa datos nga ilang nahipos sa ilang survey, 19% sa mga Filipino ang nagtuo nga dako ang papel sa PNP sa malampusong eleksyon karong tuiga.
Gipasalig usab ni Marbil nga luwas nga makaabot ug makapauli ang mga botante sa dili pa ug pagkahuman sa ilang pagbotar ug masiguro usab nga ang kasagrado sa ilang mga balota anaa sa luwas nga mga kamot.
Samtang, nagsugod karong adlawa ang full force deployment sa PNP, diin 163,621 ka mga pulis ang ipakatap sa tibuok nasod alang sa piniliay karong tuiga.
