Nagmando si Philippine National Police (PNP) acting chief Police Lieutenant General Jose Melencio Nartatez Jr. , nga pangitaon ug dakpon ang mga suspek sa walay kaluoy nga pagpatay sa usa ka kapitan sa Digos City, Davao del Sur.
Ang biktima giila nga si Oscar Bucol Jr., alyas “Dodong” kapitan sa Barangay Tres de Mayo
Nasayran nga ang biktima gipatay samtang nag-live siya sa iyang social media account niadtong Martes, Nobyembre 25.
Gipaambit ni Oscar atol sa live nga giingong nakadawat siya og mga hulga sa iyang kinabuhi, ingon man ang iyang politikal nga baruganan nga iyang gisuportahan si Davao del Sur Governor Yvonne Cagas ug gisaway ang pipila ka mga politiko sa Digos City ug Sta. Cruz.
Ang footage nagpakita kaniya nga gipusil ug nagkadugo samtang nangayo og tabang. Ang biktima patay na pag-abot.
Adunay dos milyon nga ganti alang sa bisan kinsa nga makahatag og impormasyon nga makatabang sa diha-diha nga pag-aresto sa mga suspek.
Nagsugod na ang manhunt ug sumala ni Nartatez, gimandoan niya ang mga operatiba nga pangitaon ang matag lead ug buhaton ang tanan aron mahibal-an ang lokasyon ug madakpan ang mga naghimo sa krimen.
