Gibutyag sa Philippine National Police o PNP nga wala silay nakitang na-verify nga hulga batok kang Vice President Sara Duterte o bisan sa iyang pamilya, human siya mipahayag nga nabalaka siya alang sa iyang kaluwasan.
“I do not feel safe at all, kahit anong gawin ko,” matod ni Duterte sa dihang personal siyang mitambong sa Quezon City Regional Trial Court niadtong Sabado, Setyembre 5, aron magpiyansa alang sa tulo ka counts sa kasong grave threats.
Sa pahayag ni PNP Chief PGen. Jose Melencio Nartatez Jr., wala matod pa’y personal nga misumbong o nag-report ang bise presidente ngadto sa PNP kabahin sa bisan unsang hulga batok sa iyang kinabuhi o sa iyang pamilya, lakip na ang iyang giingong mga hulga niadtong 2023.
Gipahayag usab sa PNP nga nakahatag sila og igo nga security assistance kang Duterte samtang didto siya sa Quezon City Regional Trial Court.
Matud pa ni Nartatez, luwas usab nga nakabiya sa korte ang bise presidente human kini makapag-post og P120,000 nga piyansa alang sa matag usa sa tulo ka kaso.
